韓國女星朴信惠今日喺台灣舉行粉絲見面會，一開場就以佢同李敏鎬喺韓劇《繼承者們》嘅談情畫面當背景，即時令800多名粉絲high爆。聲稱扭親腳嘅朴信惠照舊再踩高踭鞋現身，佢以甜美聲線唱咗六首歌，仲請來哥哥朴信元彈結他伴奏。

朴信惠話見到哥哥喺舞台出現感覺好奇怪，哥哥就話可能因為自己成日喺屋企瞓低唔郁，仲多謝大家咁錫妹妹，問大家係咪唔會畀妹妹拍拖，點知台下粉絲齊吼：「可以！」

會後朴信惠仲同100個粉絲合照，而開騷前，朴信惠就公開喺後台嘆珍珠奶茶嘅相。