中英混血兒何慈茵(Charlene)出身洪拳世家，早排因為打ViuTV《G-1格鬥會》，有幸被Glory Kickboxing睇中打職業比賽。Glory Kickboxing係站立格鬥技術中最大型嘅國際賽事。

日前Charlene喺深圳出席發佈會，正式簽合約，預計今年12月或下年1月打第1場職業比賽，將對戰美國拳手。佢講到打Glory原因：「能夠加盟Glory Kickboxing榮耀格鬥職業比賽，全因參加咗ViuTV G-1格鬥會。有幸被主辦機構睇中，佢哋好欣賞我嘅戰鬥格強，夠膽色，受重拳都唔怯，正所為一膽二力三功夫，膽色唔係人人都有，佢哋覺得我有做職業拳手嘅潛質。能夠成為香港首位代表上Glory擂台比賽，係人生一大光榮。」

Charlene仲話打職業賽係想增加實戰經驗，將學過嘅功夫融會貫通，不斷接受挑戰就會不斷進步。更想證明畀外界睇，功夫絕對可以應用喺真實打鬥，佢笑話：「女性更加可以好抽得，要打得精，除咗技術同體能，關鍵係膽量同識得用智慧去打。」Charlene希望可以喺職業賽創造好成績，亦想喺動作電影方面發展，成為一個真材實料嘅打女。

除咗教私人健身同為比賽默默練習之外，Charlene正喺內地拍攝動作戲《青龍門》，首次擔任女主角，佢希望帶畀觀眾新鮮刺激對打畫面，從而推廣國術同拳擊運動。

精選娛聞，喺晒《娛果》
http://fb.com/appledailyent