【新增動新聞】
NBA同Nike美國時間禮拜五喺洛杉磯舉行發佈會，公佈新球季即將推出嘅全新NBA波衫，其中最震撼嘅消息，係一剔應用喺波衫上面嘅一項劃時代設計。簡單嚟講，波衫已經唔再係一件衫咁簡單。

根據美國傳媒嘅報道，球迷喺買咗一件NBA嘅波衫之後，只要用智能電話掃瞄衫上面嘅tag，手機就可以睇到相關球員嘅比賽精華，同埋佢效力果支球員嘅消息。如果球迷喺比賽日做呢個動作，更加可以收到關於果位球員或者球隊嘅優惠，甚至係限量版波鞋都有得買。呢個全新嘅系統叫NikeConnect，無論係110蚊美金嘅Swingman版，抑或係200蚊美金嘅落場版波衫都有得玩，全新嘅Nike波衫會喺9月29日開賣。

要用到以上嘅嘢，球迷首先要download一個App，仲要有一個NikePlus嘅帳戶，只要一掃瞄波衫上面嘅tag，就可以隨時隨地睇到相關球員喺比賽期間嘅統計數據，甚至係完場後30分鐘已經有精華片睇到。比較特別嘅係，掃瞄波衫tag呢個動作連鍾意打機嘅球迷都照顧到，玩家「嘟」完個tag後會收到密碼，將呢個密碼輸入遊戲《NBA2K18》度，打機果陣相應嘅球員就會打得好啲。唔單止咁，就連NBA球星喺開波前聽嘅係乜嘢歌，你只要掃瞄波衫上嘅tag，都可以聽埋佢個playlist，總之就係全面同NBA嘅球星球隊全面接軌喇！