香港近期出現冰火兩重天局面，唔係講和平佔中同反佔中，而係股樓旺爆同時，本地生產總值（GDP）卻錄得三年以來首次按季倒退。GDP轉弱嘅罪魁禍首係旅客消費表現創出沙士以來最差，說穿了就係內地打貪反腐，令自由行嘅消費模式轉變，雖未至於知慳識斂，但肯定不再如以往般揮霍無度。

政府5月為DSD減辣，加上一手市場轉旺，樓市近月再度起飛，中原城市領先指數（CCL）連續兩星期創新高，民怨持續高企，狼英呢期主力搞政改，肯定唔會出招搞樓市，CCL要上130應該零難度。港股則受惠滬港通即將開車，突破25000大關，相信係唯一令人振奮嘅地方。諗深一層，上述所講幾個範疇，無一不與中國有關，阿爺要香港人聽話，未來對政經尺度越收越緊，不禁令人倒抽一口涼氣，大家甘心做扯線公仔嗎？袋住先定係企硬？你懂的！

有機染藍　基金掃貨

一輪牢騷過後，推介長短皆宜嘅領匯（823）。唔好以為交行貨，睇短線，美國10年期國債息低見2.34厘，創逾一年新低，高息股繼續有運行，領匯升勢未完。講中長線，恒指公司宣佈，房地產信託基金可升呢做藍籌，領匯作為行業龍頭大阿哥，最新市值過千億元，一定係染藍先鋒。一旦成事，基金掃貨之餘，隨時會掀起新一輪升級潮，炒股炒預期，領匯絕對要逢低吸納，用3厘股息率做目標，第一站先睇55蚊！呢啲贏面咁高嘅行貨，實在可遇不可求。

唐牛
https://www.facebook.com/tongcow88