外國政要元首好多都有養寵物，高官寵物更不時喺傳媒出現，成為花邊新聞主角，肥彭兩隻狗曝光率都幾高，現任特首煲呔則以養錦鯉聞名，不過其他司、局長好似冇乜邊個鍾意養寵物。但八方聽聞，保安局局長李少光屋企最近多咗七隻貓，熱鬧非常，但亦搞到佢好唔得閒。
呢排社會保護動物嘅意識日漸高漲，唔通連局長都變埋做超級貓迷？原來多得局長位新婚囝囝李霖恩，乖仔愛巢裝修，於是將七隻當正係寶貝嘅愛貓交畀爸爸媽媽照顧，李局長咁忙，湊貓嘅責任自然落喺李太身上，局長夫人亦唔介意愛仔及貓，但八方相信，李局長最想都係囝囝同新抱快啲生粒孫畀佢哋湊，好似煲呔咁榮升阿爺啦。