今晚電影《職業特工隊:叛逆帝國》於圓方舉行首映，同時為香港防癌會籌款，麥家琪帶同8歲大仔，顏子菲及朱慧敏等到場。

麥家琪表示自己有3個小朋友，大仔8歲，二仔5歲，細女就3歲，不過今日同行嘅男士就唔係佢丈夫，問佢湊3個係咪好辛苦？佢話:「都辛苦，每樣嘢講幾次，不過都開心嘅，好似我哋細個咁，媽咪都係講幾次。」

問麥家琪o依家係咪都有工作？佢話：「有呀，間唔中返內地做嘢，都係啲短時間工作，一次性，電影同其他工作居多，電視劇就冇時間，起碼要等小朋友返晒學先。」

時興美魔女，問39歲麥家琪有冇興趣好似羅霖咁影輯靚相？佢笑言：「我離咗婚就或者會。」咁嚴重？淨係影靚相喎？佢話：「淨係影靚相都會，如果影寫真就真係要離咗婚先會，o依家都唔會考慮做呢樣嘢。」佢又笑言3個仔女都話佢靚，又婉轉表示o依家社會風氣唔係咁好。

問佢o依家係咪冇咩求，唔使搵錢？麥家琪話:「都唔係嘅，主要想屋企人開心囉，自己工作平穩，喺內地都有機會，佢哋每個層面都需要藝人，唔好以為我係賣剩蔗。」