走入觀塘工廈區，穿梭人來人往的巧明街，找到這間隱藏於舊式工廠大廈的文藝生活概念店HOW。HOW佔地約7,000呎，環境開揚，分為室內和室外區域，這裏不單止代理日式傢俬這般簡單，還結合咖啡店、日式品牌髮型屋，以及賣生活雜貨等等，空間擺設井井有條。現時香港主打日式品牌的家具店越開越多，要突圍而出，HOW創辦人Fung Lan自有一套獨特的生存方法。

70後的阿Fung，在2016年與另外兩位朋友合資約數百萬元，創立了HOW。幾位合夥人主要想從日本引入高質素的傢俬品牌，創業資金只是第一步，要如何在工廈吸引人流，就是一大學問了。他解釋，「始終舖頭要上樓，都幾隱世，唔做啲嘢帶動人流，其實都幾難做，所以就諗到加埋飲食，因為容易啲吸引人流。」現時HOW業務範疇除了代理日本品牌傢俬，還有輕食、生活雜貨、與日本人合作的髮型屋等，因此以「生活概念店」形容它更為貼切。他指這個策略十分成功，客人用餐或者理髮過後，會移步參觀傢俬，「當然佢哋第一個反應就係好貴啊，但呢個亦係想佢哋研究吓點解會賣到咁貴。」

店內的傢俬價格定位在約1萬元至8萬元不等，視乎用料和手工，運送過程又要花上幾個月，聽到會卻步的客人的確不少，然而懂得欣賞的伯樂亦大有人在。HOW暫時有7個日本傢俬品牌代理在手，如廣松木工、ACME、REMBASSY、R&T等等。阿Fung感嘆日本傢具職人對製作的那份堅持，「佢哋係會畀好多心機時間，好準繩咁去做每一樣嘢，好似角度、入榫位，其實係天衣無縫嘅！」

公司至今營運了3年，現時已經慢慢回本。阿Fung回想，當初若只代理日本傢俬，沒有咖啡店其他範疇互補，或者開業未夠半年就支撐不住，更遑論租金每月要10多萬元。現時飲食業務和代理的傢俬品牌也逐漸上軌道，他目標1年後公司就能達至收支平衡。

HOW並非阿Fung第一門生意，早在2007年，讀design出身的他，就擁有自己的服裝品牌Teelocker。品牌做了2至3年，已經做得有聲有色，後來更被投資者收購，「被收購之後，我繼續喺入面做，投資者放咗好多錢落去大搞唔同市場，就喺嗰段時間我接觸到日本嗰邊嘅market喇。」那一次初出茅蘆的創業經驗，無論在知識或資金上，都為阿Fung打下穩建的根基，他笑言今次創業絕非靠父幹。

人生積蓄只有一筆，若只能在創業或買磚頭二選一，應如何選擇？阿Fung選擇了前者，在香港「有樓才是贏家」的社會標準來說，他的決定未必令人理解。「我自己都係租屋，因為我覺得買間屋就會欠下一世嘅債。你會為咗供樓搵份安安樂樂嘅工，就會冇咗份勇氣，去挑戰唔同嘅工作。」幸好太太亦十分支持他的決定，就這樣阿Fung開始了這個「不安分」的挑戰！

HOW這個名字，除了取自店舖位置巧明街的第一個英文字，另外亦是一個啟發阿Fung的問題：How to live well？他續指，「唔係代表買件傢俬返屋企，佈置得好華麗，唔係咁簡單，而係好想大家認真諗諗點樣為之生活得好呢？」那麼，香港人有沒有live well？「近年真係唔well嘅，好似香港會越嚟越差，移民潮突然出現番，有能力都會想走，所以我好想創造一個令香港人值得留喺度嘅空間。」他慶幸自己雖然不算富裕，但能做自己喜歡的事情，算是活出自己的人生。

這個愜意空間猶如石屎森林中的一點綠洲，令人有機會感受城市慢活的樂趣，與社會急促的生活節奏形成強烈對比。無論香港怎樣變，嘗試學習HOW的生活哲學，問問自己在有限空間之下「How to live well」？

記者：樊栩瑩

影片
採訪、編撰/ 樊栩瑩
攝影/ 細釗 何文超
剪接、後期/ 何文超
編導/ 何文超
編審/ 倪敏慧

investMAN
For People of Style & Substance
掌握理財智慧 感受生活品味
http://investMAN.hk
---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情： https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書