劉永原名劉添爵，現年66歲，母親係粵語片時代專演慈母嘅老牌演員黎雯，早前劉永喺觀塘一間餐廳接受《蘋果》訪問時，重提當年入行經過。

劉永喺1971年入行，演出過李小龍嘅電影《唐山大兄》、《精武門》、《猛龍過江》等，講到成名就係喺1975年，佢加入邵氏拍咗李翰祥執導嘅電影《乾隆皇奇遇記》之後大紅，跟手再拍咗一系列《乾隆皇》電影，成就呢位「皇帝小生」。
劉永話當年投考邵氏原來都有段古，佢話自己當年係瞞住媽咪投考嘅：「係邵氏打電話嚟取錄咗，媽咪至知。記得嗰時收咗兩個人，我同苗可秀。」

劉永本身係空手道黑帶高手，又學過國術，未入行前嘅就係教人空手道，所以佢開頭拍嘅都係打片，而且套套都係同李小龍合作，佢講到當年點解李小龍咁勁：「武師、武打演員是講求節奏，等如做做文戲講對白一樣。李小龍同我講：『你搵100個人企喺度，每人踢一腳、打一拳都一樣，點解我特別好，因為時間節奏抓得好。』呢個就係佢贏嘅地方。」劉永話李小龍每一套都有份拍，自從《唐山大兄》開始已經合作，當年就一直同佢對打，佢話：「我教空手道，都已經好勁，但完全唔係佢（李小龍）嗰皮，同佢一齊跑步，嗰時20歲後生跑得好快，不過都跟到，但係佢可以一路跑，跑跑吓可以『霍霍』出幾腳，好快嗰種，冇得擋。」

喺劉永眼中，李小龍係一名武痴，身體好強壯好有力氣，佢出招係帶有一種疾勁：「佢唔會打我 佢只係教我，教我打疾勁、教我博擊，唔係打套拳，係實戰嗰種。當時我教空手道，佢第一次見到我就同我講『將傳統嘅空手道忘記佢』，我諗李小龍意思係唔好拘泥喺一招一式。」