證監會今個月發表的《企業規管通訊》，內裡提到好多上市公司出盈喜或盈警時，都沒有披露數字或者明確指出程度有多重大，只用「重大」或者「大幅」等抽象的形容詞。

點為之「重大」或者「大幅」？借用高登爸打的用語，「我唔直接去答你，用例子答。」

隨手翻開今年年初公布的盈警盈喜，樓東俊安(988)、珠光控股(1176)及中國網絡教育(8055)三間公司均以「重大虧損」的字眼預告會蝕錢，結果三間公司最後分別蝕25.8億元、9.38億元及9645萬元，原來「重大」的範圍可以闊到你唔信，請問指標性何在？。畀多個例子，現代牧業(1117)、中國水業(1129)、南車時代(3898)就用「大幅增加」來預告有賺錢，埋單計數，所謂的「大幅」就是盈利可以分別升0.9倍、1.8倍及2.9倍，差距咁大，叫人點估？

其實除了「重大」或「大幅」，「顯著」、「較大」、「較多」、「較少」等字眼都一樣在通告上常見，但同樣通通睇完都唔代表升幾多跌幾多。面對住這堆假大空的抽象形容詞，人人把尺都唔同，就好似有人話肥佬黎兩年捐咗4000萬畀泛民喺好多，但睇返中聯辦一晚已經幫禮義廉籌到成七千萬，熟多熟少自有公論。

雖然證監話同過上市公司溝通後，部分公司的通告會披露預計盈利的範圍或者預計盈利的百分率變化，不過證監都承認現時仍是「有限公司」，願作量化披露的公司為數不多。粗略統計過證監發出《企業規管通訊》後至昨日，有105間公司公布盈喜或盈警，仍有近6成的通告未有作出量化披露，當中以盈警為多數；至於有量化數據提供的通告，就以盈喜佔多數，反映好多公司仲抱住「好事傳千里，壞事不出門」。

盤數點樣，其實到最後都要攤出來。盈喜盈警的目的就是要幫股東做定心理準備，正如美國最高法院大法官Louis　Brandeis的名言「陽光是最佳消毒劑」（Sunlightisthebestdisinfectant），講多兩句打定個底，股價大上大落的機會反無咁大。香港作為披露為本的市場，監管機構亦應該督促上市公司，要「講多幾句」。

顏昭昭