近期工業股有翻生迹象，唔少冷門工業股都靜靜地起革命，連一啲沉靜多時嘅工業股都突然炒上，好似隻大昌微線（567）噚日就發力抽高22%，成交額有近2700萬銀，好耐未見過咁大成交。
此股波幅相當之誇張，舊年年中由0.80元水平起步，唔使半年時間炒上最高3.60元，勁升幾倍，但係其後公布中期業績純利大幅增長，股價反而大插，個零月時間跌落1.40元水平，市值唔見咗60%，走遲半步都隨時輸死。

業績料持續增長

大昌微線截至去年9月之中期業績，營業額4.59億元，同比增長82.5%，股東應佔溢利9768萬元，增長279%，每股盈利0.2052元，中期息4仙。以此中期業績，下半年表現若拍得住上半年，每股盈利應有0.41元，去年最高位3.61元計，PE還不到10倍，股價大跌，只能怪炒得太高，投資者趁好消息獲利回吐。
大昌微線屬於PCB電路板股，近年主力生產流動電話所應用的高密度互連（HDI）線路板，受定單大升帶動，營業額及毛利率均大幅增長。目前中國與日本是全球最大兩個HDI消耗國，內地即將推出3G，對HDI需求應會相當強勁，集團業績增長應可持續。
唯一解釋急跌理由，係銅價上漲影響邊際利潤，但銅價升已不是今時今日發生，又如何解釋中期純利可以急升2倍幾？歐陽風相信更大原因係早前資金走晒去炒中資股，近期無乜股可炒，至翻兜呢類工業股仔。