今屆世界盃喺俄羅斯舉行，呢個主場近年都係新興旅遊點，有個「地頭蟲」做嚮導一定唔同啲，ViuTV食啱timming，安排旗下主持、講得一口流利廣東話嘅俄仔Artem Ansheles，帶住3位女Fans向俄羅斯出發，拍攝節目《返歸啦俄仔》，該節目將於本月25日首播。

現年23歲嘅Ansheles出生於俄羅斯堪察加半島，佢13歲跟家人由莫斯科搬去塞浦路斯居住，佢細細個好鍾意睇周星馳主演電影《少林足球》同周潤發主演電影《卧虎藏龍》，對中國文化產生濃厚興趣，本來諗住去北京發展，點知發覺唔識普通話係溝通唔到，最後Ansheles喺5年前改嚟香港，佢好勤力做model同學廣東話，靚仔外型非常入屋。

Ansheles今年2月帶團回鄉，佢去咗莫斯科、喀山、索契呢三個地方，仲同大家探索咗俄羅斯人到底係咪戰鬥民族。拍攝時，俄羅斯天氣仍然凍冰冰，但Ansheles就「暖男」上身，Ansheles媽咪都有出鏡，母子一盡地主之誼。

Ansheles話離開莫斯科後，幾乎10年冇返過去，Ansheles媽咪一聽到阿仔一拖三女衣錦還鄉，熱情媽咪買定禮物迎賓。母子度好行程，帶三女玩轉俄羅斯。Ansheles帶Fans一號YoYo去體驗莫斯科冬日活動，年青人梗係抵得冷，佢哋去紅場戶外溜冰同行冰湖，零下15度，凍到YoYo騰騰震。Ansheles媽咪又帶YoYo貼地逛街巿，嗰度除咗賣豬肉，仲有兔肉賣，原來當地好興食兔肉。Ansheles媽咪仲同YoYo各自喺街巿買食材，然後各自煮拿手美食分享，不過各自試吃對方美食時都食到偏晒嘴，Ansheles夾喺阿媽同Fans中間，左右做人難，為免順得哥情失嫂意，佢醒目借尿遁。

成日話俄羅斯多靚女，Ansheles請咗靚女鄉里Julia帶YoYo去莫斯科貼地salon變髮，Ansheles又安排YoYo換上俄羅斯傳統服飾，喺克里姆林宮前影相留念。影完靚相，佢哋又去體驗俄羅斯人傳統武術－－桑搏，當哋老幼會同班，Ansheles鍛鍊咗一陣都出晒汗。

輪到Fans二號Ceci出場，Ansheles帶佢去莫斯科坐地鐵，Ansheles話：「俄羅斯人最鐘意浮誇，嚟呢度可以感受吓。」佢哋仲應網友要求到紅燈區探險。Ansheles媽咪帶佢哋去索契，對於要跳入黑色坑渠水度，Ceci有啲尷尬。Ceci勇於嘗試，所以佢哋不但去咗世上最長嘅天空之橋觀光，仲試玩世界最高嘅高空鞦韆，俯瞰500公尺深峽谷美景。

Ansheles真係好有心，佢為Fans三號阿Mo設計行程都好有當地特色，佢哋去咗韃靼斯坦共和國首都喀山，佢哋由莫斯科搭咗12小時火車到達。Ansheles話：「俄羅斯農村女人細細個一定要學識揸牛奶。」阿Mo決心體驗一下，佢仲孖埋Ansheles媽咪去韃靼斯坦農場向一名主婦學煮佢哋家鄉菜。

Ansheles講到呢次出團趣事，佢今日回覆《蘋果》時話：「日日都好funny，2月去時天氣好凍，仲跌到負22度，因為天氣好凍，所以拍攝器材好快走咗啲電，所以我要用暖包為相機保暖。」Ansheles自爆呢次好多新嘗試，畏高嘅佢仲陪Fans玩「笨豬跳」，身為俄羅斯人，佢竟然都係第一次玩傳統武術「桑搏」，佢話原來好好玩。

精選娛聞，喺晒《娛果》
http://fb.com/appledailyent