2012年出道嘅韓國五人男團NU'EST，其所屬事務所早前安排4位成員JR、REN、旼泫及白虎參加韓國選秀節目《PRODUCE 101》嘅男團版，雖然最終只有旼泫能進入頭11名以「Wanna One」成員身份出道，但其他成員嘅實力亦獲得節目組導師認證，更多咗粉絲支持令4人人氣急升。

不過人紅就是非多，現年21歲嘅成員白虎(本名姜東昊)今日就被一名網民爆料，指自己喺8年前曾被姜東昊性騷擾。據網民指：「8年前亦即係2009年嘅冬天，當時我仲係中學1年級嘅學生，而姜東昊係中學2年級，喺晚上結束濟州島學院嘅補習後坐學院嘅車返屋企時，途中遭到佢(姜東昊)摸胸及大腿。」當事人又公開兩人嘅通話紀錄及短訊內容，不過「姜東昊」一直迴避與對方交流，反復表示「以後再說」。

姜東昊涉性騷擾一事爆出後令粉絲大感震驚，有部分網民認為只係造謠生事，亦有網民指對話錄音嘅男聲同姜東昊相似。而姜東昊所屬嘅Pledis事務所就事件發聲明：「對於喺網路上散播旗下藝人相關嘅謠言及惡意人身攻擊等誹謗、污蔑嘅行為，以及複製及散播相關內容嘅行為將採取強硬嘅法律措施。對此次事件及其他違法事件都將無一例外地採取強硬嘅法律手段應對，對應措施進行嘅相關過程亦會之後告知大家。」