地產K聽見電盈（八號仔）與中國網通商討出售固網業務，唔知係好消息定壞消息，急忙找經紀C問路；地產K之前追捧八號仔，二十五蚊買咗五千股，跌到落十五蚊，一於溝淡，買到一萬股，左丁山曾經叫佢賣晒佢，佢唔肯蝕，唉吔，跌到八蚊，地產K忍唔住，買多五千股，之後電盈股價直線下滑至八毫零，經紀K狠狠以一蚊買入十萬股，加加埋埋一共入咗十二萬股，投資四十一萬五千元，平均價係三個四毫半，以五合一之後嘅價錢計，等於十七個二毫九，現價五蚊左右，有排未得見家鄉。

左丁山從來冇買八號仔，三年來經常叫人賣得就賣，但呢次出售固定網絡，是好是壞，唔知噃，於是跟埋地產K去聽經紀C點講。經紀C話：「地產K，你咁耐都唔肯賣，呢次就冇謂沽清咯。分析事物，要睇上升與下跌嘅機率。嗱，如果電盈與網通傾唔成，基本經營因素不變，電盈冇乜唔同。如果雙方傾得成，電盈起碼多一個機會：（a）有錢減債，派息希望增加；（b）北上擴展業務，有增長潛能。照我睇，內地嘅電訊技術仍然比唔上香港，如果網通收購咗電盈嘅固網業務，好有機會借重電盈嘅人才技術隊伍，加強網通在內地嘅競爭力，對網通、電盈都好。揸咗咁耐，你都係得個希望啫，終於望到一個黎明，就不如繼續揸，博多一次！」
地產K聽到唯唯諾諾，竟然突如其來問左丁山：「你買唔買，博一博？」講真，我買嚟做乜？如地產K者，係苦心忠心耐心傷心小股東，不如就樂觀其成，望電盈?網通合作攜手創出新天地啦。