憑韓片《青年警察》入圍大鐘獎男新人嘅朴敘俊噚日襲港，今日喺九展舉辦亞洲巡迴粉絲見面會嘅首站。見港迷前，朴敘俊率先現身見媒體。

記者會準時晏晝1點舉行，身穿西裝現身嘅朴敘俊見到媒體後大派心心，及後受訪時提到《青年警察》嘅好成績，朴敘俊表示：「上月冇同導演、姜河那來港都覺得好可惜，但唔止韓國，喺海外都好受歡迎，覺得好開心。」又指同姜河那拍攝時好合拍，係一個好好嘅朋友：「佢依家入咗伍，好可惜冇得見耐啲。」

問到朴敘俊喺《青年警察》及《三流之路》騷肌時佢大感怕醜，已經表示Keep住健身8年，朴敘俊又指電影同劇集拍攝好唔同：「劇集係近鏡啲，電影因為係遠景所以要大動作啲，兩種拍攝都好唔同，都好有趣。」朴敘俊又指自己細個夢想係做棒球選手，不過父母就支持弟弟多啲，反而弟弟做咗棒球選手：「不過依家做演員都好開心，有粉絲支持覺得好滿足。」

因《三流之路》被封為「國民男友」，主持稱有唔少女粉絲見到朴敘俊時會心心眼，朴敘俊隨即大家，對於「國民男友」一詞，朴敘俊就謙虛表示係外界誇大咗，覺得有種責任感，並指自己想試做壞人嘅角色。問到會唔會想演出綜藝節目，朴敘俊稱：「依家對綜藝仲係唔熟悉，因為係表現真正嘅自己，擔心大眾會覺得我同劇中角色有出入，不過有機會都想挑戰。」

朴敘俊稱目前揀緊新作，都希望快啲以作品見粉絲，不過朴敘俊就唔肯率先透露今晚粉絲見面會有冇特別環節，只表示今晚係首次辦見面會，希望粉絲會鐘意。