爆相爆片丨王宗堯拖女友情侶黃口罩訪黃店 官司纏身下月上庭獲愛侶支持
蘋果日報 2020/09/25 00:30
MT_娛樂王宗堯黃店
41歲的王宗堯年初跟25歲蘇皓兒（Chloe）和平分手，強調不涉第三者。近日他身邊再現年輕圈外女伴，有別於過往認知的女友都是圈中人。日前有讀者透過《蘋果》「爆相爆片」分享王宗堯跟女友戴住情侶黃色口罩，手拖手逛黃店的甜蜜溫馨。
本報讀者杜小姐接受訪問時話，昨日下午4時許見到王宗堯開車去到長沙灣D2 Place商場，她說︰「佢將架車泊喺一期落車，見到佢同個女仔都戴住黃色口罩，開頭見王宗堯都周圍望，驚人認到佢。之後佢哋行咗去二期。」從短片所見王宗堯跟長髮女友行得頗急，起先行到離行離迾未有拖手，之後越行越近，在適當距離男方忽然伸出右手，女方很有默契，望都沒望就接住，二人手牽手行到商場。入到一間飾物店，女方選購小首飾，王宗堯在旁撳手機。其間女方都有問男友意見，很快就揀到心頭好畀錢，之後開車離開，前後逗留約15分鐘。
王宗堯今日接受《蘋果》訪問，承認跟這名圈外女朋友拍了幾個月拖，他說︰「你叫佢J小姐啦，都係一班朋友識，之後再發展。噚日因為臨近中秋節，要攞啲禮畀朋友，中間又有會要開，所以去咗好多地方。去長沙灣係探訪啲黃店，順便幫襯。」他笑言女朋友已經出席過自己的朋友圈。昨日跟女友都有夾過戴黃色口罩，同是Yellowfactory出品。王宗堯去年9月因為涉嫌串謀刑事毀壞及進入或逗留會議廳範圍罪名被捕，聆訊延期到下月中上庭，他說︰「同女朋友都平常心，非法集結暴動有官司，加埋今日（黃）之鋒又再俾人拉，拉你、告你機會好大。其實只要自己知道為乜嘢、做啲乜嘢，唔係殺人放火就夠，女朋友好支持。」據知，圈外人J小姐經營花店。
王宗堯跟跟長髮女友戴上黃色口罩。（讀者提供圖片）
宗堯最初與女友各有各行，行到適當距離伸出右手。（讀者提供短片截圖）
女友同時有默契伸出左手接應。（讀者提供短片截圖）
女友挑選小飾物，宗堯在旁撳手機。（讀者提供圖片）
王宗堯無悔走得太前惹上官非。（資料圖片）
王宗堯涉及案件，排期下月上庭。（資料圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！