國泰航空（293）業績記者會同股東會經常出現一個溫馨場面，就係主席白紀圖太太好多時會出現撐老公場，兩人有時仲會眉來眼去，好鬼sweet，久而久之，大家見慣不怪。噚日國泰舉行業績記者會，唔見白太蹤影，反而見到一位着住成套黃色套裝嘅高貴太太坐喺第一行（左圖），原來呢位阿太係行政總裁史樂山（右圖）嘅太座，聽講佢第一次專誠嚟撐老公場。

華華日日去記者會，當然唔覺得有乜特別，史太係家庭主婦，平日只係透過電視或者喺報紙見到老公表演，唔知係咪好奇心大發，想親身睇吓老公點樣應付記者提問，所以食完晏就過來坐坐呢？
講番白主席，白紀圖係特首選委，佢冇提名候選人，真係唔知佢支持邊位，佢噚日亦都唔願多講，只係話選委會選出最好人選為香港未來五年服務。華華思疑，白主席係咪未揸定主意呢？