呢排有劇拍又做節目主持嘅宣萱，近排頻頻置春裝，前幾日先見佢喺中環㩒錢買外套，今日下午記者又喺中環撞到佢濕平，不過宣萱今次唔係揀外套，而係揀揀揀……胸圍！！

下午3點幾，記者見到宣萱同一位女性友人喺皇后大道中一間內衣店揀胸圍內褲，前幾日佢揀嘅外套以深色為主，至於「爸爸」同底底，宣萱亦只係對神秘嘅黑色有興趣。對自己身體充份理解嘅佢，試都冇試上身，三爬兩撥就拎住戰利品去櫃枱埋單走人。

出到門口，宣萱發現有記者影相，如臨大敵之下只好同女友人避返入更衣室。10分鐘後，宣萱避無可避惟有同記者尷尬揮手，不過出咗門同友人攬攬道別後，宣萱就走咗入之前買外套嗰間店舖，跟住由後門成功遁走。