鄧麗欣(Stephy)、周秀娜、樂基兒(Gaile)等，噚晚喺九展出席電影《女士復仇》首映禮，Stephy同娜姐一黑一白嘅斜膊裝亮相，好似孖公仔咁，而Gaile就真空性感Deep V，一樣養眼。Stephy話：「我哋件衫冇襯過，只係撞款，可能就係拍戲嘅默契。希望票房有驚喜，12月好多大片上，今次部戲比自己想象中好睇，講女人，好適合女人睇，以女性為主題。」

講到最近嘅性侵熱話，Stephy話：「作為女性希望大家加油。細過住屯門，嗰時有屯門色魔，出街都好擔心。曾經試過喺街同個同學傾偈，遇上露體狂，細個唔識死，又有啲正義感，同學好驚，嗰個人揭開，見到一堆嘢，第一吓都係好驚，之後好嬲，彈出嚟鬧走個露體狂，自己都好彩，唔係發生侵犯事件，只係睇到，之後至識驚。」娜姐就話自己好彩冇遇過：「舉例，我去整頭髮，對方掂到我，會意識到對方係唔小心定刻意，如果發生事聲，應該講出嚟，杜絕呢啲事情再發生。」

同場嘅Gaile，就話老公冇嚟捧場，之後會約朋友一齊睇。戲中Gaile有性感演出，問到老公有冇介意？Gaile話：「老公唔介意，只係少少性感，我做好多運動，都會着Sport Bra，好正常，健康性感。睇完部戲之後，我覺得自己已經付出100%努力，拍第一場戲已經係好難嘅打戲，好彩冇受傷，對手叫我用盡力出力打，所以受傷都係佢哋，俾我打傷晒。」

更多娛聞，喺晒《娛果》
http://fb.com/appledailyent