百盛集團（3368）股價可以用「弱爆」嚟形容！由年初最高近7元一直向下碌，下降軌道見唔到盡頭。上星期公佈首季少賺逾27%，同店銷售（SSS）下跌2.8%。
翻查百盛舊年業績，第四季SSS下跌3%，即係今年首季基本上冇乜改善。
瑞信指，如果唔計最近黃金珠寶搶購潮的因素，SSS應該跌得更甘。百盛管理層已面對現實，降低今個財政年度SSS目標至3%。
不過，瑞信預計百盛無可能達標，最多只可以增長1.9%，嚴重跑輸同業，故繼續唱衰百盛，調低今後三年EPS預測4%至9%，仲將目標價狠削近兩成至3.48元。

現金水平急跌三成

值得留意是，截至3月底，百盛現金結餘急降三成至9.6億元人仔，麥格理指，百盛仲要向母公司支付2.9億元人仔、翻新工程又用5億元人仔，資本開支壓力增加下，盈利又未見起色，睇死股價跌至3.10元。不過，百盛月初宣佈發行5億美元債券，瑞信認為發債可增加公司資金靈活性，如收購小型商場，節省租金壓力，但短期都難見效用。
百盛公佈季績後，曾以大成交插水近9%，低見3.74元，形成一支大陰燭，跌穿08年10月低位。縱使股息率達4厘以上，有一定吸引力，不過彭博綜合分析指，六成大行都建議沽貨，「息誘」風險實在太大，好息之徒都係咪沾手。

瑪姬兒