李家鼎(鼎爺)今日以推廣大使身份出席「第52屆工展會新聞發佈會」，鼎爺憑《阿爺廚房》人氣爆升，頻頻出席活動，仲寫埋食譜兼開私房菜，日日忙到凌晨先有得瞓，鼎爺話booking已經排到明年4月，忙到連聖誕同新年節日都忘記咗，問佢想唔想放吓假同個孫去旅行休息吓？鼎爺話：「唔好話個孫，我連自己一個去旅行都冇時間。o依家休息時間都早咗，凌晨1點前就返去，兩點左右瞓。係開心嘅辛苦。」

問到有報道指私房菜營業4個月賺近千萬，鼎爺就好大反應話：「冥通都未有！我袋晒呀，唔使舖租開支、燈油火燭、人工呢？你信你都傻埋呀。都賺到錢嘅，開張用千幾萬，有排先回本。」問到有冇計劃開分店？鼎爺就話：「講係咁講啫，呢度搞清楚先，唔好咁急啦，食飯急都會哽死㗎，我都唔敢諗呢個兩個字。」

更多娛聞，喺晒《娛果》
http://fb.com/appledailyent