唐紫睿(Hazel)、「巨胸翠如」鄧月平、許雅婷同駱胤鳴等，噚晚喺九展出席九龍電競館開幕禮，幾位靚女仲組成明星電競隊，同一班電競高手進行明星賽。其中Hazel話自己最近迷上打電競，佢話：「都係因為之前拍戲嘅時候畀人導咗去玩，試過最高紀錄打通宵足足24小時。」

Hazel自覺打機技術屬於中上：「當然技術好過我嘅人仍然有好多好多。」佢仲話知道有唔少人打電競收入好好：「如果打得好嘅分分鐘仲好賺過拍戲，睇嚟我都要畀心機打好啲機。」

另外，要同Hazel一齊拍檔打比賽嘅鄧月平話，自己已經好耐冇打過機，佢話：「為咗唔累街坊，總之比賽嘅時候唔好立亂死就可以啦。」講到工作，佢話嚟緊九月就會有新歌推出，同時亦會幫Viu TV拍節目，所以今個月將會好忙。