【有人聯絡想翻拍】海潮/妲己/潘金蓮點揀? 溫碧霞:我好啱演古裝
溫碧霞潘金蓮海潮火玫瑰妲已
溫碧霞喺專訪講完感情生活,佢再講番攞獎喺泰國同北京攞獎,分別喺泰國舉行嘅「第二屆文化交流與經貿合作頒獎禮」奪傑出貢獻獎,又憑經典電視劇《火玫瑰》「海潮」一角,喺北京贏咗最佳經典影視劇女演員獎。
溫碧霞話呢兩次得獎好有意義,尤其係最佳經典影視劇女演員呢個獎,真係好大鼓勵,佢話:「喺TVB唔係拍過好多劇同角色,好似海潮、妲己同潘金蓮,不過全部都係好經典。」
呢啲經典劇喺大陸不停重播,令大人同小朋友都認識到溫碧霞,佢話好開心付出冇白費到,有時重播自己都會睇番。咁佢有冇諗過翻拍某啲劇呢?溫碧霞自爆原來真係有人聯絡過佢,想搵佢再拍潘金蓮:「對方同我講,原著入面嘅潘金蓮,同我當年拍嘅潘金蓮差好遠,所以自己都考慮緊,如果真係就下年開。」
至於溫碧霞最想再演多次嘅角色,原來係妲己,佢話:「如果有得揀,最想係妲已呢個角色,o依家翻拍好難超越到,特別係妲己,由一個單純女仔變成一個壞女人,呢幾年拍咗好多時裝劇,其實我個樣幾適合拍古裝劇。」佢仲話唔介意再次性感演出,但就有個要求:「最緊要人物突出,好多時壞女人都有好同壞嘅一面。」
溫碧霞仲話自己都壞過:「自己細個都壞,試過俾媽咪打完一巴就離家出走,去食煙飲酒蒲吧,會惹啲男仔追。」但佢話呢啲只係表面,感情都係專一嘅,入行搵到目標就乖番。
場地提供 : 富豪九龍酒店
化妝 :Khaki yan
髮型 :Ken Ng @ Queens Private i