【李八方online】陳梓維區選僅花1.3萬 千八蚊搞形象設計
蘋果日報 2019/12/30 20:43
選舉開支區議會選舉反送中抗暴之戰陳梓維
新一屆區議員過兩日履新，唔少候任議員、落選者已經向選舉事務處提交選舉開支申報，建制派一向被指有無限財力、資源選舉，但喺民意海嘯之下，民主派靠一腔熱血都已經夠做，好似贏咗民建聯油尖旺區議會主席葉傲冬嘅陳梓維咁，成場選舉只係花費咗1.3萬元，當中有7,000幾蚊係選舉宣傳，印吓海報、橫額咁，仲用咗大約1,800元做形象設計，購置衣物同買髮膠。以佢獲1,516票計算，每票值8.6元。
素人無錢是常識吧，政治明星相對資源就多啲喇，好似民陣召集人、喺沙田瀝源區當選嘅社民連岑子杰咁，申報選舉用咗大約6.2萬元，當中5.8萬元都係製作宣傳品等，不過有關開支都係由社民連負責。
建制派少數成功連任嘅雙料議員謝偉俊，今次選舉就大約用咗2.9萬元，其中有800幾蚊係畀食環署拆除其違規展示品嘅罰款，果然人類總是要重複犯錯，每次選舉都會有人違規㗎啵。
連任失敗令到屯門人要開香檳慶祝嘅建制派雙料議員何君堯就用咗4.1萬元，當中唯一一項選舉捐贈係獲一間餐廳捐贈8杯價值128蚊嘅羅漢果茶，唔知「何已完」分咗畀邊個飲呢？
-----------------------------
民陣元旦大遊行