內房股「佳兆業」（1638）大股東郭俊偉，同時係富昌金融老闆，佢眼見港股死寂，即刻搵新水源，今年轉攻樓按，幫班大陸客來港買樓投資，實行變身放數佬，同銀行與財仔搶客。金管局多次針對內地客收緊樓按成數，唔少冇香港身份證，或者冇入息證明嘅內地炒樓客要食銀行閉門羹，仲想投資，惟有向唔受金管局監管嘅財仔撲水。郭俊偉睇準呢條水，今年起富昌就做埋樓按生意，客仔借到八成，如果有內地物業抵押，分分鐘借到十成！甚至可以唔罰息贖番層樓。借得咁爽，息口當然唔低，介乎3至15厘，視乎客仔嘅信貸質素，但多數跟番內地平均息率6至7厘。

內地客有抵押　借足十成

咁都啱，香港有特別印花稅（SSD），買樓炒半年要交15%嘅SSD，一年後亦要畀5%，假設借錢一年畀6至7厘息，計落買咗層樓至少要揸一年，仲要樓價升到兩、三成，客仔先賺得過癮，收十幾厘息真係搵鬼借咩！之但係，家陣內地經濟前景轉淡，借錢畀內地人投資香港樓，會唔會製造大筆爛數呢？富昌高層梗係話唔會啦，佢指佳兆業令佢哋有客源保證，而且仲係財力雄厚嘅客，佢哋唔係冇錢買樓，而係受到滙兌限制先要問人借錢，公司亦會做足抵押，唔驚客仔走數咁話。富昌仲會幫客搵埋樓，實行提供一條龍服務，做埋地產代理嗰瓣㖭。李華華mailto:[email protected]