2020年韓劇整體出色 李準基《惡之花》屬年度推介No.1

又接近年底，今年疫情嚴重，特別是南韓，不少韓劇因為疫情得暫停拍攝，甚至停播一周，這是今年的常態了。各大媒體紛紛推出2020韓劇盤點，我就有咁遲得咁遲至落筆，何解？如果你看過這12月才上映的韓劇，那強勁卡士列陣，相信你都會等等才盤點，因為本月實在有太多強勁組合出現了！

Any肥，先聊聊前十一個月的劇集總結吧。正如我常說，韓劇主軸都是八字真言——「古靈精怪、天馬行空」，今年當然也不例外。先自聲明，這裏不是想選「2020最佳韓劇」，全是個人喜好，不過不少選出的劇集都有收視數據支持，又未至於曲高和寡，選出的，都是真心推薦，值得一看、再看。

愛情種類方面，咁其實係韓劇都包含愛情元素嘅，之不過以情愛為主線的劇集，個人覺得今年必挑的《夫妻的世界》啦（嗱，《愛的迫降》我計佢2019年放映，故不算入2020），此劇破盡收視，又有口碑，雖然不是我杯茶，但老實講，三位主角都演得好好，「最強小三」韓素希的熱論度是四月份的置頂話題，這劇反映了現實夫妻相處與外遇的熱門話題，好到肉。唔選？實畀人鬧死。不過，我就寧願睇原著《Doctor Foster》。

另一套一定要提（唔係金秀賢粉又響面書媽叉我），當然是拍得相當詭異的《雖然是精神病但沒關係》，有男神金秀賢壓陣，徐睿智演有反社會人格的女作家高文英相當搶鏡，但我最喜歡是飾演智障大哥的吳政世，個人覺得劇本屬一級，但整體拍出來效果，嗯，有少少失望。年底另一齣必選的是《Start-Up》，話題作之餘跑出史上最強男二金宣虎！早前在本欄我大篇幅讚好此男二，不過以劇論劇，我建議看十集可以收工，因為最好看的金宣虎都在十集前完成，其餘後面及結局可skip，男主角南柱赫直情完敗，陰公豬；連秀智都令人厭惡，因為佢冇揀孫志平，但着數攞盡，係自私精！

還有才剛播了兩集的《奔跑愛情》、《出軌的話就死定了》，卡士不算一線，不過看罷兩集，愛情片有追看元素，男女主角演得好，特別是《出軌》一片，相當搞笑，另文再詳述。

近年一大韓劇課題，肯定是Webtoon網漫改編的大熱韓劇！早由宋慧喬和Rain《浪漫滿屋》、朴敘俊和朴敏英《金秘書為何那樣》開始，網漫變成主流及收視保證，我個人覺得網漫其中一個賣點是毫不左膠，沒有必要說教，那率性而為的套路才是活生生的寫照，像《屍戰朝鮮》、《與神同行》入面的正邪論都很入世很到肉，沒有那些大義凜然的說教式廢話；另《大時代》復仇套路的《梨泰園Class》也相當合我心水，乃今年必看劇集（雖然結尾麻麻），男一朴敘俊係韓版劉青雲，好戲之餘更靚仔！另外網漫改編的警世小品《雙甲小食店》，黃正音演得八面玲瓏，其餘角色都演得上佳，可惜劇集叫好不叫座，但我個人強力推介《雙甲》，因為劇情好治癒，最合現今白色恐怖氛圍下，睇下放鬆下，自我安慰一番。另一齣網漫劇《便利店新星》人氣勁但拍出來強差人意，收視慘淡。我只睇了幾集，頂唔順棄劇了，見諒。

另外一定一定必看滄海遺珠有兩齣，都是近期才上映的。第一齣是另文早已超級強力推介的《驅鬼麵館》（執筆時已播六集），這裏不贅。另一齣是網漫人氣No.1之作《女神降臨》（Viu app），簡單講主線就是醜女大翻身橋段，頭一集講到女角兒時有幾醜，都幾搞笑，可以追看。兩齣漫畫劇還原度之高，拍得住《梨泰園Class》，信心保證。

韓片古靈精怪，穿越題材更拍得得心應手，今年個人神劇是《The King：永遠的君主》，雖然神劇拍得有點燒腦，睇到一般人發晒火，但李敏鎬及金高銀着實演得很好啊，早前竟然得到網選爛劇第一名，認真唔抵，個人覺得拍得唔好，導演責任好大 （結果在劇集中段更換了導演），編劇金恩淑的確是高人，配服！再補一句，《君主》一劇係要翻睇至明白箇中精采之處，信我。飾演曹影的禹棹煥亦因此劇紅咗，值得。另《重返18歲》李到晛，演活內心四十歲的角色，以後生仔來說，真心演得好好，係未來演技派，要注意了。《Alice》是一齣勁好睇的穿越劇，邏輯勁過《天能》，不過衰收尾，但整體仍屬今年上佳的穿越劇，金喜善果然係老戲骨。

論神怪喪屍片，我想《屍戰朝鮮2》當選絕對冇人反對，朱智勛大翻身之作之一，重點係第三季，因為第二季結尾出現了十秒的全智賢大特寫，這個結尾簡直又係神級，令人期待。《九尾狐傳》由《鬼怪》李棟旭擔正，戲裏古怪角色相當精采，但主線就比想像中弱，稍為失色，但韓國收視仍然第一，始終神怪劇是大熱之選吧。

懸疑殺人劇一直是韓日劇的必然之選，每季總有幾齣懸疑劇上映，2020年李準基的《惡之花》是我年度推介No.1！無論橋段、場面剪接、男女主角、配角（也紅了奸角白熙成，由金智勳飾）、結局等等全無冷場追看性超級高！如果今年到此，韓迷還未看過，我建議這個聖誕假期有必要煲咗此劇，包你睇到手心冒汗。另外沒有大卡士的《十匙一飯》，玩「誰是兇手」橋段相當紮實，演員甚有水準。《如實陳述》高開低走，前面超好睇後面超爛，金草莓大熱之選。

醫生片也是全球定期播出的片種（警匪劇我算入懸疑片種），今年一套《機智醫生生活》是各大韓網前五名之選，片裏各五大主角的友情關係寫得立體也賺人熱淚，曹政奭固然好戲不用多講，其餘四位主角演來默契感十足，也是年度治癒之選。不過，我個人會選埋《浪漫醫生金師傅2》，沒有大卡士但主角韓石圭是我杯茶，甚欣賞他那瀟灑撇脫的演繹方式，《金師傅》系列是我必看的，入面探討的人生態度取捨很有意思，就像改編自韓劇的美劇《The Good Doctor》，建議年青人可看看，必有得益。

2020的韓劇整體是出色的，比起日劇，已不知不覺間拋離一條街。

撰文：LY

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！