雷霆教練當路雲（Billy Donovan）禮拜二確認，今個夏天透過交易加盟球隊嘅明星前鋒安東尼（Carmelo Anthony）喺新球季將會轉型，以大前鋒嘅姿態出現。

喺禮拜一嘅雷霆傳媒日，有唔知碇嘅美國傳媒問Melo點睇自己今季可能要打後備，關於呢個問題，就連雷霆教練當路雲都玩埋一份：「我哋好有可能，或者，會喺第四節開波先派佢落場。」不過隔咗陣當路雲都變返認真mode：「唔係喇，安東尼今季會係我哋嘅正選大前鋒。」

安東尼生涯大部分時間都係打小前鋒，但因為雷霆另一個新兵保羅佐治（Paul George）已經霸咗呢個位，曾經十次入選明星賽嘅Melo都話自己唔介意呢個轉變。佢話：「其實我無乜問題，甚至歡迎呢個轉變，對呢隊波嚟講，咁應該係最好。依家邊個都可以打內線，二號位嘅又可以打中鋒，6呎5吋嘅又話打中鋒，所以打咩位根本無所謂，總之五個位都有人就OK喇。最緊要係知道進攻係點運作，位置嘅嘢根本唔重要。」