當年今日
關於我們

直頭部署移民?80後馬會騎師 帶埋一家大細履新

蘋果日報 2017/12/01 23:59

移民太太仔女一家大細沈拿80後馬會騎師

人離鄉賤非絕對!再戰香江的80後馬會騎師(俗稱公司騎師)沈拿,此行肯定不愁寂寞,既有「青梅竹馬」的意大利同鄉李寶利共戰沙場,亦有老婆仔女一起生活,難怪他顯得心境開朗,對今次客串充滿自信。
沈:沈拿 記:《蘋果》記者
記:上次你嚟香港只係自己一個人,今次就唔同,太太同一對仔女都會陪伴左右。
沈:冇錯,太太同仔女喺聖誕前就飛到香港,佢哋都好雀躍,五歲大女Alessia同兩歲半細仔Marco非常興奮,因為卡塔爾係回教國家,聖誕氣氛唔濃厚,佢哋知道香港有好多聖誕燈飾,都非常好奇。
對我嚟講,有家人陪伴真係好重要,佢哋係我工作嘅動力,有些陣上贏唔到頭馬,當然會唔開心,但一返屋企見到屋企人,就會感受到佢哋嘅支持,呢點係非常重要,我覺得有佢哋陪伴左右,自己陣上發揮更佳。