麒叔噚日出席港台一個公開活動，坦言確有出街前先睇片呢個做法，因為港台係傳媒機構，處理重大同敏感題材時，台長應該了解節目內容，佢否認干預編輯自主，「我三番四次同佢哋（員工）講，整個傳媒都係有呢個規矩，我哋都冇例外。」又為編輯自主下新定義，「係港台整體編輯自主，唔係每個人都獨立自主。」
港台有800幾個員工，麒叔話若非由佢作主，人人自主反而冇晒自主，佢一片苦心，唔止六四節目，其他戲劇、時事節目、紀錄片都過問，但聲言至今對港台公共事務節目「未改過半寸」，八方指佢曾提出修改《老土正傳》內容，佢改口承認有就戲劇部份提出意見。
做台長事事關心，難怪煲呔信得過佢收拾港台，以前台長張敏儀唔係咁㗎，佢接受港台訪問時話領導港台有個原則，就係絕少喺節目出街前睇片，以尊重編輯同編導，希望繼任台長秉承，事實證明新人事，新作風，期望變耳邊風。
港台金漆招牌有份量，有員工透露電視部同內地某電視台搭上，傾緊為對方一套建政60年外交成就紀錄片繙譯字幕做英文，雖然只係後期製作，卻可能掛上港台「合作拍攝」招牌，呢位員工指港台冇參與亦無過問紀錄片內容，甘於自閹為中共歌功頌德，斷送金漆招牌令人痛心。港台發言人稱港台與外地傳媒合作有先例，上述合作計劃仍在洽談，暫未有進一步消息可提供。
「撐港台」運動成員麥燕庭批評黃華麒損害港台編輯自主，如果台長認為節目有問題，應該向高層反映，事先睇片並諸多意見提出修改，令員工承受不必要沉重壓力，唔合乎工作程序，台長都唔撐自己人，只會令港台「更加難撐」。
mailto:
[email protected]