周潤發、甄子丹同郭富城演出嘅電影《大鬧天宮》今晚喺圓方RitzCarlton酒店慶功，該片喺內地票房勁收8億人仔，香港票房約2,500萬，老闆王海峰宣佈8月開拍續集《三打白骨精》，並邀請古天樂飾演唐僧。

問到會唔會由原班人馬演出？王海峰話：「未必呀，子丹咁貴，不如你哋幫口叫佢收平啲！」子丹聽聞此事後笑言：「我已經收得好平，係友情價，唔通問我收番10年前嘅價，不如你哋同佢講唔好咁貪心。」子丹話8月要拍《卧虎2》，未知有冇檔期。

同場嘅發哥就笑言：「呢啲要問吓阿太（指老婆）畀唔畀我開，但係貴都唔係我收，係太太收，唔關我事，呢啲阿太傾，我邊有資格傾。」古仔飾演唐僧膚色會唔會太黑呀？發哥搞笑話：「好靚仔呀，叫佢日日攞檸檬水漂白，最緊要齋戒沐浴！」城城就話：「我一定係最抵用嗰個。」