費倫天拿散班，球員全部獲准自由轉會，其中隊長迪里維奧亦有唔少球會吼佢，不過佢就話見到費倫天拿搞成咁，加上意大利國家隊又喺世界盃咁早出局，心都淡埋，重話想「掛靴」㖭！
我求大俠唔知迪里維奧係一時意氣講誨氣說話，抑或真係諗住退休，如果佢真係唔踢，就實在可惜。因為佢雖然成三十六歲，但喺上季所見，佢每場都博盡，做足職業球員應有嘅本份，咁有誠意嘅球員𠵱家真係買少見少。天無絕人之路，好球員冇理由冇人吼嘅。

法蘭西斯搵錯醫生
NBA火箭主將法蘭西斯上季因為偏頭痛，訪尋名醫都唔知乜病，𠵱家終於證實係內耳不平衡。我求大俠真係𢱑晒頭，如果畀我哋中國人醫，就唔使搞咁耐啦，因為偏頭痛同頭暈都係內耳不平衡好普通嘅病徵，真係懷疑啲西方醫學點先進。

多蒙特設中文簡體字版
多蒙特喺球壇嘅成就雖然唔及拜仁，不過就俾對方有生意頭腦。德甲聯喺中國都幾受歡迎，所以多蒙特亦特登喺佢哋個官方網頁，增設中文簡體字版本，以便打入中國人嘅市場。咁樣睇嚟，做嘢慢半拍（官方網頁英文版更新唔夠快兼冇中文版）嘅拜仁，真係要同多蒙特學吓嘢。