由「哥哥」張國榮帶起嘅經典髮型「鴨尾頭」，三字頭以上嘅男士，除非唔係喺香港長大，又或者out到冇人有，否則未梳過呢個髮型都一定聽過！
1989年，哥哥唱《側面》嗰期剪咗個新髮型，後尾枕底部嘅頭髮蹺起，好似鴨尾咁，又型又潮，好多男仔即刻跟風。聽講嗰時佢哋出親街都要托一托個大會指定髮尾定型，呢個指定動作非常經典，而因為條鴨尾用好多定型髮膠，仲搞到噴髮膠差啲賣斷市㖭。髮型名店Orient4嘅老細CK，當年已經係星級髮型師，講起「鴨尾頭」，佢都話係經典之中嘅經典，當年啲十幾二十歲𡃁仔，人人走入嚟都話要剪鴨尾頭，盛況空前，但係過咗冇幾耐，哥哥轉咗髮型，呢種鴨尾頭興咗年幾兩年就冇乜人再剪嘞。
記者：黃可欣