【新增動新聞】

利物浦禮拜五喺英超作客阿仙奴踢成3:3，門將米諾列特再一次出醜難免成為話柄，前紐卡素中場贊拿斯更加喺英國《BBC》嘅一個電台節目一針見血咁指出紅軍最大嘅問題所在。

阿仙奴中場格列沙加喺56分鐘嘅一腳射波雖然勁度十足，但根本無角度可言，但係米諾列特都要失守。《利物浦回聲報》幫呢場波嘅球員評分，除咗受傷退下火線嘅佐敦軒達臣同埋上陣時間唔多嘅阿歷士張伯倫無評分之外，米諾列特只係得全隊最低嘅4分。

對於呢位比利時國腳嘅表現，贊拿斯賽後表示：「門將呢個位置係一個好大嘅問題，好似利記呢啲咁嘅大球會，負責把關嘅應該係一個更好嘅守門員，就係咁簡單！」前曼聯後衛加利尼維利就話：「踢走佢喇！你睇下哥迪奧拿點做？佢埋咗哥迪奧巴禾返嚟，但表現唔好，適應唔到英超就即刻唔用佢，艾達臣摩拉斯嚟到之後表現幾好！曼城嘅兩閘唔掂，哥迪奧拿趕走晒佢哋，用1億3,000萬鎊買過三個新嘅，咁就解決咗問題！」

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM