特首梁振英率領嘅9.3閱兵團，今朝出發，周五返港。雖則呢次閱兵席位，政商界爭崩頭，但有啲嘢卻係爭得到都未必好喎，事緣唔少收到閱兵須知嘅隨團人士，發現此行規條多多，擔心唔攰死都會熱死喎。
到底有乜規矩令佢哋未出發、先洩氣？話說9月3日喺天安門舉行嘅閱兵儀式，雖則10點先舉行，卻要求8點已經到達，曾經參與2009年閱兵嘅李國麟話根據經驗，可能清晨4點零就要起身，準備6點幾坐官方車出發，到場後大排長龍等安檢。

入座要行一粒鐘

咪以有車直抵現場，就算早起都唔怕，據知今次官方車輛停泊位離會場好遠，獲邀者已被知會由落車到座位，或要行一粒鐘；要行長路，着波鞋最方便啦，點知卻須正裝赴會，若然短褲波鞋，都唔知入唔入到場。據聞連同徒步及等候時間，閱兵需時長達7粒鐘；獲邀嘅湯家驊透露，政府中人溫馨提示，出發前唔好食早餐、唔好飲咁多水，因為其間若要去廁所要行好遠，過程更「安檢到你暈」。
八方睇過，9.3當日北京氣溫預計達30℃，為免暴曬7粒鐘中暑，攞把風扇仔或擔遮都好正常吖，點知原來呢啲都係「違禁品」，湯家驊話獲知會只能帶手機、相機，其他包括雨傘同風扇都唔帶得，嚴禁「傘兵」同「廢青」。萬一唔舒服又點算好？八方聽聞現場有醫療隊standby，準備隨時為在場人士急救。據知當晚6點零7點仲有場文藝晚會，但嘉賓要自己食飯後出席，預計晚上10點幾先回館休息，頻頻撲撲卻無啖好食，八方諗起都戥佢哋辛苦咯。

李八方
mailto://[email protected]