當年今日

本田總舵手麥Sir對新Accord充滿信心

蘋果日報 2003/05/25 00:00


自1976年第一代推出至今,已經歷27個年頭嘅Accord車系,雖然早陣子廠方經已將第七代新車,陸續響全球各地推售,惟香港一直押後至今年5月才正式登場;正藉SARS疫潮下,香港市況百業蕭條,究竟新Accord能否響逆市下站穩陣腳呢?睇嚟一堆堆嘅疑團,真係要搵嚟本田嘅董事總經理麥烱添先生,方能獲得答案。
「響1983年下旬走馬上任,首要工作係提升Civic銷量,反觀Accord當年不愁去路,反映出當時香港經濟起飛,對中型轎車需求激增呢!」麥Sir說。但又點解遲遲唔推出第7代Accord呢?「原定4月登場嘅新Accord,適逢SARS疫潮,為咗避炎嘅關係,無辦法唔將推出日子一再押後,絕非對新車無信心呀!」麥Sir淡定地說;「新一代Accord改由泰國分廠製造,唔擔心用家有信心危機,皆因珠玉在前,德國一線車款既有南非製,又有墨西哥生產型號,銷量何曾有下跌呢?事關新一代用家對汽車認知度較深,只要保持到高規格嘅汽車生產線檢定,相信車迷嘅信心定必與日俱增㗎!再講,新Accord唔單止賣相變得有動感富活力,像極我喜歡S2000嘅造型,只要客人肯坐入車廂,佢不僅感受到一份寬敞豪邁嘅氣息,駕駛起來座艙嘅寧靜度,匹配埋上乘嘅操控性同循迹力,又豈會係一般日本車可凌駕吖!」麥Sir認真地說。
「香港人經歷無數風浪,但定必要放眼將來,雖然過往新Accord車系曾錄得多次高銷量紀錄,但現實下嘅香港市況,我哋唔敢幻想新Accord會有月銷五、六百車嘅紀錄,惟新車設備一應俱全,加上定價實在是吸引,預期首年新Accord銷售目標會有500部上落。」筆者與麥Sir一席對話結束前,他臉上仍有十足信心呢!