【短片】【佢話係個女仔「中」埋嚟】老公唔認偷食人妻 林雅詩喊爆決離婚

蘋果日報 2015/11/12 06:00

蘋果離婚人妻即時好心分手第三者啜爆林雅詩溫文英

日日都有新聞嘅林雅詩,由出寫真、鎅手、透露夫妻不和、老公溫文英養鬼仔,至到噚日老公仲做埋封面人物,背住林雅詩喺街頭啜爆人妻……林雅詩即於fb轉貼相關報道,呼籲網民幫手起底,又寫道:「當大家覺得我犯賤,老公有錢又錫我,點解仲要返出嚟拍寫真?有啲人仲話我攞我老公博宣傳、我老公好慘。現在真相大白,我忍咗咁耐!」

將家事「透明處理」嘅林雅詩,獲不少網民力撐,林雅詩再寫道:「謝謝壹週刊報導,謝謝我嘅粉絲報料,我現在心情真的很難平伏,希望我可以撐下去。」有網民勸佢為兒子諗清楚,也有人留言:「你俾條片佢(溫文英)自己睇等佢俾甚麼反應你,再同佢解釋仲好。」

林雅詩今日到淺水灣出席香港燒烤節,身穿大露背裝,似是沒精打采,心情頗差。之後林上台唱《好心分手》,忍不住傷心流淚;期間有工作人員向佢遞紙巾,但林雅詩冇用到。

訪問期間,林雅詩心情很差。談到唱《好心分手》,林雅詩表示:「呢個係我嘅心情嚟嘅,本身搵咗兩首歌,另一首係輕快啲嘅。」問到是否因為有了決定才選唱《好心分手》?林雅詩謂:「依家搵咗律師安排緊。」可有跟丈夫提過?佢話:「我有同佢講過。」有何反應?林雅詩頓了頓,想了一想,謂:「佢冇反應。」

可有就偷食一事向丈夫求證?林雅詩又想了想,話:「佢唔認囉。」有相有片為證,林謂:「好失望,佢話係個女仔『中』埋去嘅,咁唔通我推開人咩?」記者再問其夫可有氹番佢?此時林雅詩哭了,經理人馬上遞上紙巾,抹乾眼淚,林雅詩搖搖頭表示沒有。

可是對丈夫死心了?林雅詩表示:「死心喇,佢做乜嘢都已經挽回唔到。唔係咁樣答囉,唔承認自己做過嘅嘢,好無稽。」