去年與無綫簽藝員合約的陳煒劇接劇，向來予人較柔情的煒哥，在早前播完的劇集《法網狙擊》中首次演奸角，煒哥坦言角色霸氣十足：「會有少少類似電影《本能》嘅莎朗史東咁，性感形象，但言談間好淡定！」她坦言角色與本性剛好相反：「我本身易話為，人哋要求我點，都會盡量配合，可以講話同衰人兩個字完全兩個極端，我事前做咗好多功夫，都要等觀眾去評價，始終好與壞都接受同埋會盡量改善。」
出名身材好的煒哥在劇中着三點式大騷性感本錢，與郭政鴻在遊艇上親熱兼有場浴室大戰鏡頭。煒哥坦言劇情需要不介意性感：「其實我向來都唔覺得自己性感，為咗工作我絕對配合。」已婚的煒哥與老公分隔兩地工作，但一有時間均會見面，問到性感拍劇可有向老公備案？她說：「佢好尊重我嘅工作，好了解我係一個有分寸嘅人，完全唔會擔心我，有次我同老公食飯撞到戲中同我親熱嘅郭政鴻，我仲同老公講笑話佢係我男友，兩個之後都飲咗杯酒，有傾有講完全冇問題。」

煒哥直言要感激《法》劇監製文偉鴻賞識，她說：「當日我只係入電視城傾嘢，佢一見到我就話呢個角色啱我，仲提議無綫簽我，真係好多謝佢。」煒哥表示奸開有條路，文偉鴻稍後開拍新劇，亦預留反派角色給她，她說：「可能佢對我做奸角都滿意，不過我希望演奸都可以有唔同感覺同層次。」
近年不少亞視花旦過檔無綫，煒哥表示各有各做，不擔心與萬綺雯被拿來比較：「唔會擔心，大家嘅路線同戲路都唔同，都係做好自己本份，我擔心演出機會，多過擔心人哋嘅事。」
撰文：王崇穎