當年今日
關於我們

【引渡惡法】8歲小朋友唔怕攰堅持行畢全程 回流中產對政府失信心擬二度移民

蘋果日報 2019/06/09 14:56


【新增動新聞】
今日天氣酷熱,但無阻市民齊心上街反惡法。由反國教、反23條已經帶長女出來遊行的劉太表示,今次做足準備工夫,強調要推着BB車去到政總,「我係為緊佢行,所以,佢自己都需要出嚟!反送中條例長遠更影響呢代細路的成長環境⋯⋯出嚟行有無用都好,唔通你畀人強姦,係咪唔掙扎?」
劉太坦言,今次政府通過條例的機會很大,已經開始了解移民資料,像蘇格蘭等相對平靜的地方,「我想通過了,有六、七成機會移民⋯⋯很無奈,因為香港已經唔係畀真正香港人居住,離開香港係唯一出路」。
黃先生一家四口冒着炎熱天氣出來遊行,「帶埋小朋友嚟,都係為咗下一代先行出嚟。作為家長做到嘅嘢唔多,(出來遊行)為咗小朋友有一個公平、公正嘅法治基礎,可以畀佢哋繼續成長。」被問到有否想過移民,他慨嘆並非人人都有這個能力,「有能力嘅話,都會考慮。因為真係睇唔到個前景。(移民念頭)都有閃過出嚟嘅,文化近啲嘅咪台灣,遠啲加拿大都諗過。」
黃指近來朋友聚會,也多了談移民的話題,身邊已有人毅然移民加拿大,不過他認為即使留下也有原因,「有啲嘢又唔甘心嘅,始終呢度係自己成長嘅地方。能力係其中一個因素,但始終我嘅根都仲喺呢邊,心情上都有考慮。」
剛畢業的廖小姐與爸爸一同來遊行,她表示將來有機會,也想離開香港去其他地方生活,一來是增廣見聞,二來自己生於1997年,卻看不到一國兩制可以維持到50年;其父廖先生表示,97回歸前曾經計劃好移民,結果因為一些事情最終留下在香港,他指歷年來如2003年反23條等遊行一直有參加,「現在咁嘅情況得佢哋考慮啫,自己年紀大,都冇呢個打算啦。」他估計今日人潮會比當年後23條更多。
同樣帶三個小孩上街遊行的Samuel則批評,林鄭政府只給予市民20天諮詢,卻指市民不理解,「你得20日,我點理解啫?」他指遊行是為了讓兒女將來在一個公平、公開和自由的環境成長,固然有留意移民資訊,只是能力有限未必可實行,形容自己有三個孩子移民吃力,所以才更要出來遊行反抗不公義的送中條例。
首次遊行的8歲梁小朋友坦言很熱及疲累,不過會堅持完成遊行:「行出嚟係反對林鄭月娥(推惡法)。」媽媽梁太承認首次帶子女遊行,自言身為小市民、根本無經濟能力移民,擔心「送中條例」直接影響下一代的權益與自由:「好擔心今次唔出嚟表達意見,唔知再有無機會,我覺得家長有責任畀小朋友機會,知道香港發生咩事,將來佢哋大個有機會獨立分析反省,探索呢個香港係咩一回事。」
同是會計師的曾先生與太太(化名),育有一對分別6歲、4歲子女,曾先生直言「大是大非」才會出來遊行,上一次遊行已經是03年反廿三條立法:「我公司有中資背景,你公開表態(政治立場)會影響工作⋯⋯由梁振英治港時代已經開始有呢種文化。」他認為推倒惡法機會一半一半:「林鄭就算明知惡法影響香港,礙於身分做唔到啲咩,反而香港人行出嚟,起碼佢哋有其他想法畀大陸睇。」
至於由內地移居香港十多年,育有兩名在港出生的子女陳先生,甚至連子女背影也堅拒記者拍攝:「佢哋成日會返大陸探親,學校又有交流團,我驚會影響佢哋前途⋯⋯用盡方法申請嚟香港,當然信唔過大陸,佢哋無法治,你有錢都未必有法治。」他坦言沒想過移民,早視香港為家,早置業與開展事業,而香港生活與內地親戚聯繫亦方便:「我好多大陸朋友都有嚟遊行。」
回流港人打算二度移民
有九七回歸前已舉家移民的回流港人,近期打算二度移民,返回紐西蘭過退休生活。王先生全家早於回歸前已移民紐西蘭,他指當時還覺得家人決定,阻礙他留在香港發展事業,故96年回流香港,太太則於2002年回流,回想才發現家人的決定如斯可貴,「屋企已經投中共政府唔信任一票啦,我哋係下一代可以享受到(移民)呢件事。到大個出嚟工作體會個社會時,先發現又係另一回事。」
王先生憶述指,回流之後早些年已打算移民,但一直沒有真正離開,直到最近覺得所謂五十年不變、真普選,一切都不易落實,形容自己對香港政府不信任,近5年令他好失望,走的決心也越來越堅定。
他指經歷過董建華年代推出23條,之後被50萬人上街推翻,後來雨傘運動再次給他正面鼓勵,但近年政府對民意越來越背道而馳,「好似我哋越表達民意,就越管束得我哋犀利。我覺得同我心中嘅一國兩制同民主,越嚟越遠,好失望。」他批評林鄭不理不睬市民,「你咪反對囉,最緊要我跟住中央嘅旨意走咋嘛。 佢做得比過往嘅特首,更加明目張膽、露骨。」
王先生認為自己幸運,有上一代準備後路,不過即使上一代沒有這樣做,到他們自己決定,也會選擇移民,直指因為香港社會的關係,所以沒有和太太生兒育女,「係我哋對社會環境投不信任票先唔生細路仔。」雖然決心離開,但他表示自己還抱有少許希望惡法有轉彎的餘地,「如果唔係我今日唔出嚟喇。我哋都希望好似03年,或者雨傘運動咁,畀到一絲希望我哋再改變,希望香港可以變好。」
陳先生和太太一同出席遊行,異口同聲表示有意移民。陳太指,1989年至今,香港變化很大,現時政府已根本不理會民意,總是硬推政策,完全沒有邏輯可言,「我唔知點解我要交稅囉」。她坦言,夫婦二人正在計劃移民,雖不會一時三刻成事,但去意已決,政府即使有任何改變也難以挽留,也不會再相信政府的承諾,「我哋讀歷史嘅,所以好熟共產黨嘅嘢」。二人坦言,不捨得離開香港,但陳先生表示,「唔捨得還唔捨得,但香港已經變到好陌生,唔係想走,係(政府)焗你走」。
72歲的羅女士表示,林鄭政府從不為香港人著想如同「賣港」,「做咁多衰嘢」浪費納稅人金錢,只為習近平服務。她坦言,自己有移民外地的想法,但奈何自己沒有能力實行,「香港人有本事就移民,冇本事就要行出嚟」,以人數和民意迫使林鄭下台。
61歲林女士表示,近年香港政治環境逐漸變差,坦言已認為香港沒有希望,但仍要盡一分力反抗到底,「唔行出嚟根本一啲希望都冇」。她指,自己沒有移民的打算,指自己「生於斯、長於斯」,見證香港的發展,「呢個土地係我哋上一代建設落嚟,你捨唔捨得畀佢俾人侵蝕呢?我真係唔捨得囉」。但她認為,香港變差首當其衝的是年輕一代,稱如果女兒有意離開,自己不會阻止。
遊行隊伍中有港人移民千里迢迢返港出席。加拿大港人移民專頁「住加男人」版主陳裕榮和龍華琛不時在專頁上分享移民資訊,陳因為六月在港工作順便參加遊行,龍則特意將工作日程調動,以便加入遊行。他們指群組上的移民潮查詢自大灣區推出開始明顯增加,逃犯條例後更甚,當中包括不少中產精英,由政府部門、金融、法律等轉業界別人士都有,大部分為兒女選擇移民。
「解決問題係應該正視根源。我點解要走,唔係因為嘆世界,而係為下一代走,係因為對政府失望。」龍華琛悲觀地說,大家都是最後一代香港人,但正面地看,就是「做得幾多得幾多」,引述英雄電影《雷神奇俠3》中,國民的土地被侵略毀滅,他們改在宇宙中飄浮,繼續承傳自己族群的精神,藉此向港人寄語無論在任何角落,都做好自己的本份,「我哋喺出面繼續做返我哋要做嘅嘢,教廣東話、向仔女講點解要移民。人可以流落其他地方,但精神仲可以發展。」
另一回港參加六四晚會及今日遊行的移民Bonnie,早於80年代中已經移民加國,她指近年香港發生的事,其實好多海外移民都十分關注,有機會也想出一分力,如在多倫多便有不同聲援活動,在海外善用言論自由的空間,在國際上為港人發聲,「大家走就係驚咗共產黨先走。唔好以係移民咗嘅人乜都唔理,人走咗,但心仲喺香港」。
徐先生育有一名7歲兒子及5歲女兒,由2時左右開始起步,中途偶爾停下來休息,小朋友吃乾糧也沒有去食店,堅持至10時抵達政總:「要畀小朋友知道遇到不公義需要出一分力——而遊行是發聲機會。我們只是普通基層市民,無能力移民,希望可以出到呢一分力。」而徐太則表示,過往也有參與遊行,坦言送中條例通過,小朋友成長階段反而會越來越少機會遊行。
徐先生無奈地說:「我哋都叫做睇住回歸後香港越來越差,最辛苦係佢哋(小朋友)!」
「係支持!」就算明天考試,父母仍堅持自己行足8小時的小男生,又是否知道遊行是甚麼?「係支持(反惡法)」徐太補充,身邊約有3分1朋友今次出來遊行:「當然有留喺屋企的,那些叫唔醒⋯⋯」
【民陣6.9反惡法遊行】
日期:6月9日(日)
集合地點:維園草地
時間:下午2時30分集合,3時正起步
遊行路線:維園草地遊行至金鐘添美道立法會
(資料來源:民陣)
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
empty
empty
劉太(左)坦言,今次政府通過條例的機會很大,已經開始了解移民資料坦言,今次政府通過條例的機會很大,已經開始了解移民資料。廖小姐(右)與爸爸一同來遊行,她表示將來有機會,也想離開香港去其他地方生活,因看不到一國兩制可以維持到50年。
empty
徐家。羅惠儀攝
empty
羅惠儀攝
empty
羅惠儀攝
empty
羅惠儀攝
empty
羅惠儀攝