新世界中國（917）上星期五喺祖國房地產股起哄下，畀反應升咗3格，呢劑反應畀得好，有得諗。
新中今年2月2供3，每股伸手價2.8元，集資63億銀，連同新中去年底手頭現金29億銀，新中現金應該高達92億銀，減晒60億銀貸，淨現金差唔多32億銀，現金底厚。況且新中現價2.55元，相對最新NAV6蚊折讓近58%，打大風都無有怕。
又呢期所見，好多港資超級大孖沙北上積極囤積土儲，好相信大孖沙中線除咗靠本土搵餐晏，更加想依重祖國食大茶飯，所以，呢勻新中阿媽新世界（017）自己賣港產樓都掂檔，但長遠少少睇，最有可能係靠新中發圍。
新中早年已經投資祖國，手頭物業土儲講緊1720萬平方米，拋離行家九條街，除非唔想做嘢，否則，呢隻股應該有好大發揮空間。新中上星期五微升，已經貼喺年頭以嚟下降軌，若連帶7、8月橫行頂2.675元都突破埋，確認扶搖直上。