韓國女團少女時代嘅秀英首次挑戰50集長劇，跟溫朱莞、徐孝琳等人演出MBC新劇《做飯的男人》。劇集聽日首播，劇組今日就公開新劇照，當中秀英跟溫朱莞更齊齊喺同一張床上，唔通二人有「床戲」？

於新公開嘅劇照中，秀英跟溫朱莞單獨於同一個房間內，二人都穿上居家服，唔通一開始就同居？而當秀英瞓喺床上時，溫朱莞就望實女方，氣氛非常曖昧。

於其他劇照中，就見到秀英露出受到巨大衝擊嘅表情，而且將身體蜷縮成一團，又用枕頭狠狠地打溫朱莞，令人非常好奇二人到底發生咩事。見到秀英跟溫朱莞一開始就咁親密，未知秀英男友鄭京浩點睇？

另外，李鍾碩跟秀智主演嘅SBS新劇《當你沉睡時》將於27日首播，雖然劇集係「先拍後播」，而且早已煞科，不過劇組今日就公開當初一眾演員讀劇本嘅舊照。