央視報道阿蓉同團友混戰事件，形容係香港醜聞。話口未完，香港又有「醜聞」，《大公報》網站「大公網」有篇香港農曆年市道嘅報道，居然係《商場新春墮胎量生意較去年同期錄得增一成》。香港新正頭咁多人墮胎？真係大吉利是。聰明嘅你可能已經估到，「墮胎」其實係「人流」之誤。
報道前日出街，獲網民狂like狂share，據講大公網點擊率頓時激增。報道話，市民農曆年消費意欲旺盛，新地預計旗下商場「墮胎量」達699萬，觀塘一間商場年初一至初三已有140萬人墮胎。

軟件轉換出事

八方翻查前日《大公報》，發現係講　「人流」，印刷版正常，網版變咗「墮胎」。喺大陸，墮胎即人工流產簡稱「人流」。據了解，原來香港《大公報》所有報道都會經北京server上載去大公網，轉換軟件除咗繁體變簡體字，仲會將港式用語變成大陸用語，之後又用同一軟件轉番做繁體，擺喺香港大公網，因此得出人流變墮胎嘅奇觀。有讀者噚日致電《大公報》查詢之後，網站先將「墮胎」改做「客流」。
喺網上搜尋一下，會發現《大公報》「墮胎熱」一早遍地開花，例如「商場紛借智慧手機吸墮胎」、「墮胎逾萬將開備用通道」、日前報道發叔去車公廟求籤，仲話「雖然墮胎眾多，但有檔主卻表示旺丁不旺財」㖭。