港股前日嘅弱勢，帶到噚日朝早，恒指一早低開，跌幅一度擴大到661點，半日收報27077點，跌402點。網友見個市繼續調整，問有冇醒目仔執平貨？
不過，好多網友都回應話未夠平，呢個時候去執貨，似乎言之尚早。hk9394hk寧願唔做醒目仔，睇定啲先，因為「睇唔通睇唔透，暫時觀望。」lilith13索性做觀眾，講笑話：「啱啱落樓下入咗貨──薯片兩大包──等睇戲。」完璧甚至話：「嚴中看淡，不會入貨。」
肥魔鬼覺得未係時候做醒目仔住，「邊有咁多平貨吖？」ckh3111仲講反話：「真係好多『平』貨：差唔多50蚊嘅神華（1088）、國壽（2628）、超過廿蚊嘅中煤（1898）、中交建（1800），差唔多廿蚊嘅財險（2328）。」

係都等禮拜五啦

kuokwok仲慘，佢話：「前日上午高追，家吓坐艇中。」因為一早中伏，所以唔敢咁快執貨。明天OK覺得可以等多一日，話噚日點會有平貨買：「係都等禮拜五。」
有唔少醒目網友其實都有晒目標，喺度等緊心目中的平價，好似Raul7777_sm話：「想入2689（玖龍紙業），等穿22蚊即入。」matrix0998都係，「2007（碧桂園）等12.5蚊入；1919（中國遠洋）等20蚊。」