呢期內地領導至潮活動，可能係響應領導號召，搞「民主生活會」自我批評，整頓不是之處；主席習近平早前仲親身參加河北嘅省委常委民主生活會㖭。厲行節儉嘅中聯辦，據講最近再加強好多慳家大法，水、電、紙、用車等等乜嘢都慳，莫非西環都搞過民主生活會，就浪費作風自我檢視過？

中聯辦主任張曉明喺今年初已經講到明，會遵從中央嘅節儉作風，下令西環人員要減少應酬，嚴禁同香港市民打交道時收受禮金禮物，出席社團聚會時都唔可以參加抽獎同收果籃。

冷氣不可低過26℃

唔止對外，原來西環內部都走上「慳啲啦」之路。有左報透露，中聯辦西環大樓內，水、電、電話費、辦公室用品同埋活動經費等，一律慳字行先，包括信封要循環再用、白紙就底面都用，夏天開冷氣唔可以低過26℃。
若然要出席公務活動，西環幹部都盡量搭公共交通工具。好似張曉明咁，日前出席十一升旗禮，佢同其他副主任有專車唔坐，走去同其他下屬一齊坐16座小巴。中聯辦冇透露上述慳家措施可以節省幾多錢，亦無講目標要慳幾多，不過為對付佔中而畀嘅「特區維穩費」肯定越來越多，慳自己豪人哋，難為張主任咯。

mailto:[email protected]

死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24