學民思潮召集人黃之鋒舊年喺夏愨道過18歲生日，今年書展佢就推出新書《我不是細路──十八前後》。本書無搵學者議員寫推薦序，反而搵咗兩位之鋒口中最了解佢嘅女子──媽媽同女友錢詩文操刀。
平日之鋒表現硬淨，機關槍咁講嘢嘅style深入民心，錢詩文喺序中就講番之鋒軟弱一面，形容鏡頭後嘅之鋒，係毒男、派膠、講情話會Lag機，透露之鋒第一次表白時，用咗30秒先講到5個字；第一次面對女仔發脾氣，之鋒居然話驚過見到梁振英！

遊日搵河童「認祖歸宗」

之鋒媽媽嘅推薦序一樣感人。佢透露時刻機不離手嘅之鋒，舊年手提電話費期期過千蚊，佢走去電訊商門市查數，對方以為佢個仔一定係不停上網打機煲劇煲電話粥，問佢個仔係咪做sales要講咁多電話。惟有做媽媽嘅知道，個仔sell嘅係「真普選」，默默為個仔upgrade咗個無限上網同通話月費plan。之鋒喺本書都有覆番呢兩封「情書」，想睇詳情可以去白卷出版社買本書睇。
而身在日本遊埠嘅之鋒成日俾藍絲笑個樣似日本河童，之鋒趁機搵番自己嘅「祖先」！佢喺facebook上載咗兩張同河童像合照嘅相，仲好抵死咁留言「我嚟咗搵我祖先啦！」、「今日特登着𠵱件衫，真係《尋找家鄉的故事》」，有網民話佢終於「認祖歸宗」，亦有人留意到佢個肚腩仔出咗嚟，怕且返港後要多啲做運動咯。

李八方
mailto:[email protected]