上周英超波熱門大佔上風,今周牌面非常緊湊;重心取對賽賠率最懸殊一戰,捧剛打入足總盃決賽嘅阿士東維拉,作客敢攻跌watt嘅曼城,首選博大冷[+1]。
如果認為目前排第4嘅曼城,有必要喺現階段有場場贏嘅決心,以保住來屆歐聯一席位;又或者近季主場對賽剋住維拉,咁今戰主W僅賣1.17倍,實唔穩陣。始終班波下半季大跌watt,領隊比歷連尼季尾多數要走人,上仗表面2:0贏早夠分上岸嘅韋斯咸,但實情係末段被對手反客為主,幸靠門將赫特保不失;加上目前仍領先第5位嘅利記7分但多賽一場,藍月今季餘下戰績估計如一般中游分子,步入反覆期,不宜盲捧。
對手維拉近排「托弗」,冠絕中下游球隊,連續喺聯賽及足總盃擊敗熱刺及利物浦,非「狐狸」李斯特城只連勝韋斯咸、西布朗及史雲斯呢類中游球隊可比。當然,因李城連取9分,護級人人自危,維拉必要收起入盃仔決賽嘅興奮,專心打護級戰;當中搶分王牌賓迪基,近六戰入八球,曼城中堅文加拉震過「貓王」咯。維拉隱憂亦來自唔穩嘅後備中堅奧哥尼,故博3.95倍[+1]之餘,可攻入球「大」或「總入球」3、4球作過關。
再選取上周末因遷就足總盃而冇比賽、獲充足休息機會嘅昆士柏,主場贏下半季如「豆腐」嘅韋斯咸,保護級希望。「槌仔」韋斯咸踏入二月後,11戰只曾一勝,客場亦三連敗,連作客當時包尾嘅李城也照輸,任人魚肉咯;昆軍上仗僅負車仔,起碼見求存戰意鼎盛,休息期多咗對隊內老兵好似森莫亞、祖爾巴頓及曉爾等三線主力,有莫大幫助。昆軍近戰主場鬥同市倫敦勁旅全僅輸一球,敗不足辱,筆者雖然貼呢隊波冇乜緣份,都要再上貼士框一次。
再選今晚早場,熱刺受讓修咸頓博[+1],兩隊爭歐霸席位,雖然戰意會以前者較強,但呢類五五波,好難讓得起;當中主隊續缺停賽嘅雲耶馬影響最大,呢位肯亞中場近三場缺陣嘅比賽,球隊全敗,加上計箭頭腳風,哈利卡尼較主隊嘅加斯安奴柏利順得多,熱刺南征仍有力坐和過贏,受讓甚穩。
波神
神級攻略 智破足彩