日劇《深夜食堂》大受歡迎，現時已經拍到第3輯，更搬上大銀幕，《深夜食堂》電影版今日已喺日本上映。

小林薰、小田切讓、多部未華子、高岡早紀同筒井道隆等一班演員同埋導演松岡錠司，今朝11點左右就去咗位於東京嘅戲院謝票。

觀眾要晨早睇完部戲先見到班演員，所以連導演都笑住話明明係「深夜食堂」，適合夜晚睇，但結果變左「晨早食堂」。導演仲多謝觀眾咁凍都咁早起身，仲講笑話小林薰開心到匿喺廁所喊。

戲份甚多嘅多部未華子話，為部戲有學過做燒蛋卷同用刀，仲話初初用刀都有啲驚；而小田切讓就話最開心係可以一路飲酒一路拍。

至於司儀問到有乜料理最難忘時，小田切讓就講話舊年去紐約旅行時，有人帶佢去著名泰國菜館食，明明食泰菜，但係有啲菜式好似拿破侖意粉咁嘅味。

而最搞笑就係小林薰，佢話有個朋友唔食納豆，老婆整次次都唔肯食，反而一次佢去咗個朋友屋企整五色納豆，佢朋友竟然食，朋友老婆仲話：「小林薰整納豆你就食。」而冇幾耐朋友就同老婆離咗婚。