年初至今,就算獨沽一味投資黃金,仍然可以賺足20%;與此同時,日圓亦升足一成。當明白到今年唔買債券淨買黃金一樣爆到癲嘅時候,你就會後悔,點解仲要周圍搵高人指路,反正簡簡單單原來都可以有正回報,原來人人都可以成為好成功而坊間又好迷信其功力嘅「對冲基金經理」。唔好忘記,年初至今,恒指都只係升唔夠5%,就知要跑贏大市原來唔難。
然而,大家會留意到平時人講佢就瞓、瞓醒佢就問嘅路人甲乙丙,問得最多係可唔可以入市買黃金嘅時候,唔係2009年2月金價由每盎斯1,000美元之上,跌至3月883美元嘅時候;亦唔係舊年12月由1,226美元,掟番轉頭見今年2月初1,044美元之時;更加唔係於7月底1,157美元,以早晨之星再起步之時,而係近期金價由1,200美元升到唔識番轉頭之時,至嚟問家可唔可以入市買金做對冲。
當大家眼見連將軍澳領匯商場,都可以見到開咗一間裝修簡陋但以CashForGold做招牌嘅舖頭,就知道坊間對實金需求渴到咩地步。
當有財經記者打電話去銀行放蛇,扮幫阿媽問仲有冇金幣出售嘅時候,連續4間銀行都答所有金幣已經沽清。