姜麗文（Lesley）走出四年抑鬱症陰霾，前晚喺灣仔舉行迷你音樂會，陳柏宇擔任嘉賓。佢嘅叔叔姜大偉、嬸嬸李琳琳、哥哥姜文杰都有去捧場，不過爸爸秦沛因為要返內地拍戲嚟唔到，Lesley話：「唔緊要，我錄畀佢。我哋講嘢好肉麻，佢同我講proud of you、good show。」精神奕奕嘅Lesley笑話：「心情太興奮，媽咪成日笑我，每逢有大事發生都會感冒，上台唱OK嘅，我一向熱愛唱歌表演，過去四年抑鬱症，𠵱家情緒身體都健康，好開心幸福。」同抑鬱症打仗，佢話冇靠藥物：「有見心理醫生，每個禮拜做五、六次運動，之後去咗美國讀心理課程，又喺韓國製作hip hop歌，當然家人、朋友嘅支持都好重要。」

準備好再愛

出道七年，Lesley一直係自由身，佢話聖誕前會宣佈簽公司，希望有個錫自己，可以一齊成長嘅公司。再出席音樂頒獎禮，如果撞到舊愛鄭俊弘同何雁詩咁點？佢話：「祝大家開心健康，唔會尷尬，都過咗咁耐，𠵱家好開心，成長咗，最重要大家都開心。」於感情方面，佢帶笑話：「啱啱返嚟，暫時想工作，真係好老套，我鍾意工作，想忙啲。」預備拍拖未？Lesley即話：「未ready好唔會出嚟。」
撰文：馮仁昭