郭富城、馮紹峰、趙麗穎、小沈陽、梁詠琪、羅仲謙、林志玲、苑瓊丹等，演出嘅特效動作喜劇《西遊記女兒國》喺出年賀歲檔期上映，呢套片卡士咁大，即牽起海外發行權、網絡版權等爭奪戰，經過多月嚟爭逐，《女兒國》嘅獨家網絡版權，最終由愛奇藝以破紀錄天價奪得。

星皓《西遊記》系列中，第一波《大鬧天宮》於2014年成為賀歲檔期電影票房冠軍之外，更成為當時中國史上，第五部可以衝破10億大關嘅賣座電影；連同2016年賀歲片《孫悟空三打白骨精》，喺內地票房超過12億元人民幣，兩片全球總票房就幾近30億人民幣。

唔知第3部主打特效動作喜劇成績係點，有實力同呢之大片一較高下嘅，當然係安樂嘅《捉妖記2》，到時鹿死誰手，且看大年初一開畫數字，但o依家喺網絡版權賣埠方面，星皓先贏一仗，聽講愛奇藝用咗天價2億人民幣買咗獨家網絡版權，又刷新咗電影網絡版權最高價紀錄，而騰訊就以1.5億買咗《捉》片續集網絡版權。

問番星皓公司負責人王海平回應：「《女兒國》網絡版權係賣咗俾愛奇藝，價錢係好合理，但實際金額唔講得，係商業秘密。」

好似今次《西》片製作連宣傳費投資金額共超過5.5億人民幣，真係好落本。西遊記系列已經成為星皓公司生招牌，就因為呢個系列喺內地成功咗，吸引咗香港主板上市公司高雅光學（00907）喺今年10月27日正式公告，向星皓影業收購咗香港星皓電影發行公司全部股權，並擁有星皓影業所製作嘅電影喺香港及海外（中國內地除外）嘅獨家發行權及相關權利，包括2018賀歲片《西遊記女兒國》。如果有留意下財經新聞就知有上市公司背後撐住星皓，呢間公司以後開戲，水頭就更加充足。

更多娛聞，喺晒《娛果》
http://fb.com/appledailyent