陳欣健(Philip)噚晚喺旺角麥花臣場館舉行演唱會，只演一場，全場爆滿。撐場睇騷嘅嘉賓就有汪明荃、胡楓、薛家燕、盧冠廷夫婦等。着住西裝出場嘅Philip話：「我第一次開個人演唱會，自己買咗800幾張飛，你哋想聽乜?如果想聽我唱歌，我一首金曲都冇，如果想聽我講笑，係咪搞錯咗，黃子華仲未開騷，定係大家買錯咗胡楓嘅飛?如果係，大家可以憑今晚票尾去換胡楓嘅飛。」台下嘅修哥聽到即刻哈哈笑。

正式開場，Philip先同陳潔靈合唱《今晚夜》、《 星夜星塵》，唱完歌，Philip送花多謝對方，但又搞笑話：「收完要放番去後台，因為我冇Budget。」反而陳潔靈就認真話：「我同你唔係講錢係講心嘅。」。到華星年代環節，佢同車婉婉合唱當年愛將Sammi嘅《其實你心裡有沒有我》，之後再由車婉婉獨唱《叮噹》。

跟住到梁漢文(Edmond)上台，Philip話：「呢個係我當年好錫嘅小朋友。」Edmond笑話：「我都已經唔係小朋友，四條啦！你以前成日睇我哋開騷，今晚終於可以坐喺度睇你開騷。」Philip話想合唱《纏綿遊戲》，Edmond：即話：「吓?點合唱，呢首獨唱歌。」原來Philip將前段意大利文音哼出嚟，Edmond就唱埋後尾。之後Philip唱多幾首貓王嘅歌，仲有啲英文金曲，再用羅文腔唱《獅子山下》，唱完了後佢就話：「我扮羅文敢認第二，冇人敢認第一。」接住就係李思捷出場，兩人一齊扮其他歌手腔唱歌。

當Philip唱《You Raised Me Up》去到中途時，佢個大女陳早茵就神秘上台合唱，因為Philip事前真係唔知，當見到個女時，感動到眼都紅晒。去到encore，Philip話要多謝兩個女：「佢哋成日覺得我係娛樂大家，其實佢哋至係我最重要嘅觀眾，我亦要多謝我太太，好多人都換畫，但佢都係依然嗰個人，近兩年佢身體唔舒服(患有輕微腦退化)，希望嚟緊日子，我多啲時間陪佢，畀佢之前欠缺嘅快樂。」最後Philip請咗Joe Junior、Christine Samson、Anders Nelsson等逐個上台大合唱，最後再搵埋台下睇騷嘅阿姐、盧冠廷、修哥等上台合唱。

Philip於騷後接受訪問，佢笑話：「10隻腳趾好似斷晒咁滯，以前做司儀企係冇問題，但唱歌跳舞腳趾好似甩晒咁。」今次碌盡人情卡，請咗好多嘉賓上台，不過Philip就話上得台幫手嘅都係好朋友，所以唔係問題，食餐飯多謝佢哋就得。講到今次演出感受，Philip話：「我同自己講，上到台就要享受每一個位，因為未必再有下次。我買咗802飛，係身邊朋友透過我訂飛，好感動，大家咁支持我。」

更多娛聞，喺晒《娛果》
http://fb.com/appledailyent