當年今日
關於我們

【暖男!】孔劉自動擘髀變矮仔 遷就工作人員

蘋果日報 2017/01/28 16:00

鬼怪澳洲孔劉

由孔劉、金高恩、李棟旭、劉仁娜等主演嘅人氣韓劇《鬼怪》早前已大結局,下月6號劇組就會到布吉慶功旅行,而男主角日前就飛咗去澳洲還廣告債。
由於孔劉憑《屍殺列車》同《鬼怪》都人氣急升,所到之處都有一大批粉絲追訪,去澳洲拍廣告連日來都被粉絲捕獲。噚日佢為代言嘅咖啡品牌拍廣告期間,喺草地上散步,十足十「鬼怪」上身一樣,事關喺《鬼怪》中孔劉就最愛去佢嘅秘密花園漫步沉思,去到澳洲同樣喺草地上散步。
拍攝時可見孔劉對工作人員都好鬼貼心,知道自己比較高,於是就刻意擘開啲對腳、「整矮」自己來遷就工作人員為佢補妝,網民都大讚佢係名副其實嘅暖男。而噚日收工後,佢繼續被捕獲返酒店,今日同樣被網民捕獲,可見佢幾受歡迎。
另外,孔劉代言嘅品牌就公開孔劉新年祝賀照片,李棟旭同樣有拍片同粉絲講新年快樂。